माथिल्लो त्रिशूली–३ ‘ए’ को सुरुङमा फसेकाको रातभर उद्धारको प्रयास, सर्च क्यामेराबाट खोजी
काठमाडौं— माथिल्लो त्रिशूली–३ ‘ए’ जलविद्युत आयोजनाको सुरुङमा फसेका व्यक्तिहरूको उद्धारका लागि रातभर खोज तथा उद्धार अभियान सञ्चालन गरिएको छ ।
प्रतिकूल मौसम, अविरल वर्षा र रातको अँध्यारोका बीच पनि नेपाली सेनासहितको उद्धार टोली घटनास्थलमा खटिएर उद्धार प्रयास जारी राखेको प्रधानमन्त्री बालेन्द्र शाहको सचिवालयले जनाएको छ ।
रातको समयमा उद्धार कार्यमा देखिएको चुनौतीलाई कम गर्न घटनास्थलमा उच्च क्षमताका फ्लडलाइट जडान गरिएको छ । सुरुङ आसपास थुप्रिएको पहिरो तथा माटो हटाउन जेसीबीसहितका भारी एक्स्क्याभेटर निरन्तर परिचालन गरिएको छ ।
उद्धार टोलीले अत्याधुनिक ‘सर्च क्यामेरा’ र विशेष मोनिटर प्रयोग गरी सुरुङभित्र तथा पुरिएका सम्भावित स्थानमा सूक्ष्म रूपमा खोजी गरिरहेको जनाइएको छ ।
पहिरो तथा माटो पन्छाउँदै सुरुङसम्म पुग्ने बाटो खुलाउने र फसेका व्यक्तिहरूको अवस्थाबारे जानकारी लिने प्रयास भइरहेको छ ।
प्रतिकूल मौसम र जोखिमपूर्ण भौगोलिक अवस्थाका बीच उद्धार टोलीले सम्भावित सबै उपाय प्रयोग गरेर खोजी तथा उद्धार अभियानलाई निरन्तरता दिएको छ ।
