७५३ पालिकामध्ये १०० मा महिला नेतृत्वलाई प्राथमिकता दिने कांग्रेसको घोषणा
काठमाडौँ— नेपाली कांग्रेसले आगामी स्थानीय तह निर्वाचनमा महिला नेतृत्वलाई प्राथमिकता दिने नीति अघि सारेको छ । कांग्रेस सभापति गगनकुमार थापाले देशभरका ७५३ स्थानीय तहमध्ये कम्तीमा १०० पालिकामा महिला मेयर वा अध्यक्षलाई उम्मेदवार बनाउने योजना सार्वजनिक गरेका छन् ।
कांग्रेस महाधिवेशनको बन्दसत्रमा बोल्दै सभापति थापाले उम्मेदवार छनोटका लागि केन्द्रीय कार्यालयअन्तर्गत ‘इलेक्सन ब्युरो’ गठन गर्ने जानकारी दिए । उक्त ब्युरोले स्थानीय तहका उम्मेदवार छनोट गर्ने र आवश्यकता तथा उपयुक्तताका आधारमा पार्टी बाहिरका व्यक्तिलाई समेत उम्मेदवार बनाउन सकिने उनको भनाइ थियो ।
थापाले स्थानीय तहको नेतृत्वका लागि उम्मेदवार तयार पार्न ‘लिडरसिप एकेडेमी’ स्थापना गर्ने योजना पनि अघि सारे । उनका अनुसार एकेडेमीको प्रशिक्षण पूरा गरेका व्यक्तिलाई मात्र उम्मेदवार बनाउने व्यवस्था गरिनेछ ।
स्थानीय तहको नेतृत्वमा पुग्ने व्यक्तिले स्थानीय सरकार सञ्चालन, सार्वजनिक वित्त, जलवायु परिवर्तनलगायत विषयमा आधारभूत ज्ञान राख्नुपर्नेमा उनले जोड दिए । गाउँपालिका वा नगरपालिका सञ्चालन केवल राजनीतिक अनुभवले मात्र सम्भव नहुने भन्दै थापाले नेतृत्वलाई विषयगत रूपमा सक्षम बनाउनुपर्ने धारणा राखे ।
सभापति थापाले आफ्नो राजनीतिक दृष्टिकोणमा राज्य र नागरिकबीचको सम्बन्धलाई समेत प्राथमिकता दिएका छन् । राज्य नागरिकको अभिभावक भएकाले त्यसमा करुणा र समभाव हुनुपर्ने उनको भनाइ थियो । नागरिकका लागि पर्याप्त ‘सिभिक स्पेस’ निर्माण गर्नुपर्ने र नागरिकले आफ्ना विचार तथा सरोकार राख्ने फराकिलो मञ्च पाउनुपर्ने उनले बताए ।
थापाले नेपालको सांस्कृतिक पहिचान र राज्यको भूमिकाबारे पनि धारणा राखे। नेपाली समाजका चाडपर्व, संस्कृति र परम्परासँग राज्य पूर्ण रूपमा निरपेक्ष रहन नसक्ने भन्दै उनले सांस्कृतिक पहिचानलाई राज्यको नीतिसँग जोडेर अघि बढाउनुपर्ने बताए ।
त्यसैगरी, राजनीतिक प्रतिवेदनमा बजार, निजी क्षेत्र र सरकारको भूमिकाबीचको सम्बन्धबारे समेत चर्चा गरिएको उनले जानकारी दिए ।
