पश्चिमी वायुको प्रभाव कायमै, कोशी र गण्डकीका हिमाली क्षेत्रमा वर्षा–हिमपातको सम्भावना
काठमाडौँ— पश्चिमी वायुको आंशिक प्रभावका कारण देशका हिमाली तथा पहाडी क्षेत्रमा मौसममा बदली देखिएको छ । मौसम पूर्वानुमान महाशाखाका अनुसार तराईका अधिकांश भूभागमा भने मौसम मुख्यतया सफा रहनेछ ।
महाशाखाका अनुसार आज दिउँसो हिमाली र पहाडी क्षेत्रमा आंशिक बदली रहनेछ । कोशी र गण्डकी प्रदेशका हिमाली भूभागका एक–दुई स्थानमा हल्का वर्षा तथा हिमपातको सम्भावना रहेको छ ।
तराई क्षेत्रमा भने मौसम मुख्यतया सफा रहने पूर्वानुमान छ ।
आज राति कोशी, बागमती, गण्डकी र कर्णाली प्रदेशका हिमाली क्षेत्रमा आंशिक बदली रहनेछ । बाँकी हिमाली तथा पहाडी क्षेत्रमा मौसम मुख्यतया सफा रहने महाशाखाले जनाएको छ ।
तराई, काठमाडौँ उपत्यका तथा पहाडी खोँचहरूमा बिहानको समयमा केही स्थानमा हुस्सु र कुहिरो लाग्ने सम्भावना रहेको छ । यसले बिहानको समयमा सडक तथा हवाई यातायातमा सामान्य प्रभाव पार्न सक्ने भएकाले आवश्यक सतर्कता अपनाउन महाशाखाले सुझाव दिएको छ ।
यस्तै, सोमबार पनि हिमाली तथा पहाडी क्षेत्रमा आंशिक बदली रहनेछ भने तराईमा मौसम मुख्यतया सफा रहनेछ । सोमबार कोशी प्रदेशका हिमाली भूभागका एक–दुई स्थानमा हल्का वर्षा र हिमपात हुनसक्ने पूर्वानुमान महाशाखाले गरेको छ ।
