दैलेखमा बञ्चरो प्रहारबाट श्रीमतीको पनि मृत्यु, मृतकको संख्या तीन पुग्यो – Nepalboli

दैलेखमा बञ्चरो प्रहारबाट श्रीमतीको पनि मृत्यु, मृतकको संख्या तीन पुग्यो

   २०८३ मंसिर ६, शनिबार  

सुर्खेत– दैलेखमा घरायसी विवादका क्रममा श्रीमानले बञ्चरो प्रहार गर्दा गम्भीर घाइते भएकी महिलाको पनि मृत्यु भएको छ । यससँगै घटनामा मृत्यु हुनेको संख्या तीन पुगेको छ ।

चामुण्डा बिन्द्रासैनी नगरपालिका–३ पानीखोलामा शनिबार बिहान करिब ९ः३५ बजे ३८ वर्षीय अम्बर सलामी मगरले आफ्नै श्रीमती र तीन सन्तानमाथि दाउरा काट्ने बञ्चरो प्रहार गरेको प्रहरीले जनाएको छ ।

बञ्चरो प्रहारबाट गम्भीर घाइते भएका १२ वर्षीय छोरा तपेन्द्र सलामी र ३ वर्षीया छोरी करिश्मा सलामीलाई नगर अस्पताल दुल्लु लगिएको थियो । चिकित्सकले बिहान ११ः१० बजे दुवैलाई मृत घोषणा गरेका थिए ।

घटनामा गम्भीर घाइते भएकी ३५ वर्षीया श्रीमती मनिषा सलामी मगरलाई थप उपचारका लागि प्रदेश अस्पताल कालागाउँ, सुर्खेत ल्याइएको थियो । अस्पतालमा दिउँसो २ बजे पुगेकी उनलाई चिकित्सकले २ः१० बजे मृत घोषणा गरेका हुन् ।

घटनामा घाइते भएका ६ वर्षीय छोरा मिलन सलामीको भने प्रदेश अस्पताल सुर्खेतमा उपचार भइरहेको छ ।

घटनापछि प्रहरीले अम्बर सलामी मगरलाई नियन्त्रणमा लिएको छ । प्रहरीले घटनामा प्रयोग भएको बञ्चरोसमेत बरामद गरेको छ ।

घटनाको कारण र विस्तृत विवरणबारे थप अनुसन्धान भइरहेको जिल्ला प्रहरी कार्यालय दैलेखले जनाएको छ ।

फेसबुकबाट तपाईको प्रतिक्रिया सबै