हुलाकी सडक अलपत्र पारेको भन्दै रास्वपा नेता अमरेश सिंहलाई स्थानीयको कालो झन्डा
विराटनगर— लामो समयदेखि निर्माण अलपत्र परेको हुलाकी राजमार्गको कटहरी खण्डलाई लिएर स्थानीय युवाले राष्ट्रिय स्वतन्त्र पार्टी (रास्वपा) का नेता डा. अमरेश सिंहको विरोध गरेका छन् ।
सडक निर्माणमा भइरहेको ढिलाइप्रति आक्रोश जनाउँदै सिंहको उपस्थितिमा स्थानीय युवाले कालो झन्डा देखाएका हुन् । वर्षौंदेखि सडक निर्माण पूरा नहुँदा आफूहरूले दैनिक सास्ती खेप्नुपरेको भन्दै उनीहरूले तत्काल काम अघि बढाउन माग गरेका छन् ।
कटहरी खण्डको सडक जीर्ण र अव्यवस्थित हुँदा स्थानीयको आवतजावत प्रभावित हुँदै आएको छ । सडकको अवस्था बिग्रँदा धुलो, हिलो र यातायातको असहजताले स्थानीयवासी हैरान छन् ।
विकास आयोजनाको काम लामो समयसम्म अलपत्र रहँदा नागरिकले प्रत्यक्ष समस्या भोग्नुपरेको भन्दै स्थानीयले सम्बन्धित निकायको ध्यानाकर्षण गराउन प्रदर्शन गरेको बताएका छन् ।
उनीहरूले हुलाकी राजमार्गको कटहरी खण्डमा रोकिएको निर्माण कार्य तत्काल गति दिई निर्धारित समयमै सडक निर्माण सम्पन्न गर्न सम्बन्धित पक्षसँग माग गरेका छन् ।