रास्वपाको ‘हामी आउँदै छौँ’ अभियानः ७५३ पालिकामा नेताहरू परिचालन
काठमाडौँ —राष्ट्रिय स्वतन्त्र पार्टी (रास्वपा)ले आगामी स्थानीय तह निर्वाचनलाई लक्षित गर्दै देशव्यापी संगठनात्मक तथा जनसंवाद अभियान सञ्चालन गर्ने भएको छ ।
रास्वपाको केन्द्रीय समिति बैठकले असोज २० देखि २७ गतेसम्म सञ्चालन हुने ‘हामी आउँदै छौँ’ अभियान अन्तर्गत केन्द्रीय सदस्य र प्रतिनिधिसभा सदस्यलाई ७७ जिल्लाका ७५३ वटै पालिकामा परिचालन गर्ने निर्णय गरेको हो । अभियानमा नागरिक, पार्टी सदस्य तथा स्थानीय सरोकारवालासँग छलफल गरी सुझाव संकलन गरिनेछ ।
पार्टीले अभियानलाई आगामी स्थानीय निर्वाचनको तयारीसँगै सरकारमा रहेर गरेका काम नागरिकसमक्ष पुर्याउने माध्यमका रूपमा अघि सारेको छ । रास्वपा सहमहामन्त्री निशा डाँगीका अनुसार अभियानका क्रममा नागरिकका समस्या सुन्नुका साथै पार्टीका योजना र आगामी निर्वाचनको तयारीबारे पनि जानकारी दिइनेछ ।
उम्मेदवार छनोटको विधिबारे पनि जानकारी
रास्वपाले स्थानीय तह निर्वाचनका लागि उम्मेदवार छनोट प्रक्रियाबारे नागरिकलाई जानकारी गराउने जनाएको छ । पार्टीले यसअघि क्यान्डिडेट क्लब, लिडरसिप एकेडेमी तथा लोकतान्त्रिक छनोट प्रक्रिया समेटिएको रूपरेखा अघि सारेको छ ।
अभियानमार्फत स्थानीय तहमा नेतृत्व छनोटको प्रक्रिया र आगामी निर्वाचनमा पार्टीले अपनाउने विधिबारे नागरिकसँग प्रत्यक्ष संवाद गरिनेछ ।
यसैबीच, रास्वपाले स्थानीय निर्वाचनका लागि महामन्त्री विपिन आचार्यको संयोजकत्वमा केन्द्रीय उम्मेदवार छनोट समिति समेत गठन गरिसकेको छ । समितिमा मिलन लिम्बू, रहबर अन्सारी, तोसिमा कार्की, कविन्द्र बुर्लाकोटी, सुशान्त बैदिक, टासी ल्हाजोम र जनक सिंह धामी सदस्य छन् ।
सरकारका छ महिनाका काम नागरिकमाझ
अभियानको अर्को प्रमुख पक्ष वर्तमान सरकार गठन भएयता भएका कामबारे नागरिकलाई जानकारी गराउनु रहेको रास्वपाले जनाएको छ ।
संसद् र सरकारमार्फत भएका नीतिगत पहल, नागरिकसँग गरिएका प्रतिबद्धताको कार्यान्वयन अवस्था तथा आगामी योजनाबारे स्थानीय तहमा प्रत्यक्ष जानकारी दिइने पार्टीको भनाइ छ ।
रास्वपाका अनुसार अभियान चुनावी तयारीमा मात्र सीमित नरही स्थानीय सरकारको जवाफदेहिता र नागरिक सहभागितासँग जोडिनेछ। पार्टीले नागरिकसँग प्रत्यक्ष संवादमार्फत स्थानीय तहका समस्या, अपेक्षा र सुझाव संकलन गर्ने जनाएको छ ।
यसरी रास्वपाले स्थानीय निर्वाचनअघि संगठन विस्तार, सम्भावित उम्मेदवार पहिचान, जनसंवाद र सरकारका कामको विवरण सार्वजनिक गर्ने चारवटै पक्षलाई एउटै अभियानमा जोडेको देखिन्छ ।
