हिम्लुङ हिमपहिरोः मृतकको संख्या १५ पुग्यो, एक अझै बेपत्ता
मनाङ— मनाङको नार्पाभूमि गाउँपालिका–५ स्थित हिम्लुङ हिमालमा गएको हिमपहिरोमा बेपत्तामध्ये थप आठ जनाको शव भेटिएपछि मृतक आरोहीको संख्या १५ पुगेको छ ।
असोज ११ गते बिहान हिमालको आधार शिविरमा गएको हिमपहिरोमा परेर उनीहरू बेपत्ता भएका थिए । खोजीका क्रममा यसअघि सात जनाको शव फेला परेको थियो भने बिहीबार बिहान चार र दिउँसो थप चार जनाको शव भेटिएको सहायक प्रमुख जिल्ला अधिकारी कृष्णप्रसाद पौडेलले जानकारी दिए ।
उनका अनुसार भेटिएका आठ शवमध्ये दुईवटा सदरमुकाम चामे ल्याइसकिएको छ भने थप छ शव फूगाउँसम्म ल्याइएको छ । रात परिसकेकाले हेलिकोप्टर उडान सम्भव नभएकाले बाँकी शव शुक्रबार चामे ल्याउने तयारी छ ।
‘दुई जनाको शव सदरमुकाम चामे ल्याइएको छ, छ शव फूगाउँसम्म ल्याइएको छ,’ सहायक प्रमुख जिल्ला अधिकारी पौडेलले भने, ‘रात परिसकेकाले हेलिकोप्टर उडान हुन सक्दैन । शुक्रबार अरु शव ल्याउँछौँ ।’
नेपाली सेनाको हेलिकोप्टरमार्फत शवहरूलाई सुरक्षित स्थानतर्फ ल्याइएको हो । हिमपहिरोमा परी अझै एक जना बेपत्ता रहेका छन् । उनको खोजी कार्य जारी छ ।
यसैबीच नेपाली सेनाको टोलीले स्थानीय तथा अन्य सुरक्षा निकायसँगको समन्वयमा उद्धार तथा व्यवस्थापनका थप काम अघि बढाएको छ । सेनाले चामे गाउँपालिका–४ स्थित ठाडो खोलामा पहिरोका कारण थुनिएको मस्र्याङ्दी नदीको बहाव खुलाउने तथा अवरुद्ध विद्युत् प्रसारण लाइन सञ्चालनमा ल्याउने कामसमेत गरिरहेको छ ।
खोज तथा उद्धारलाई प्रभावकारी बनाउन नेपाल नेशनल माउन्टेन गाइड एसोसिएसन (एनएनएमजीए) ले हिम्लुङ हिमाल क्षेत्रमा ११ सदस्यीय उद्धार दक्ष टोली परिचालन गरेको छ ।
