सेती नदीमा कुकुर फालिएको भिडियो भाइरल, महिलाको पहिचानमा जुट्यो प्रहरी
धनगढी— बझाङमा पुलबाट कुकुरलाई सेती नदीमा फालिएको भिडियो सामाजिक सञ्जालमा भाइरल भएपछि प्रहरीले घटनामा संलग्न महिलाको पहिचान र अनुसन्धान अघि बढाएको छ ।
जयपृथ्वी नगरपालिका–१० पानकोटस्थित पुलबाट एक महिलाले रातो रङको कुकुरलाई उर्लिएको सेती नदीमा फालेको भिडियो सार्वजनिक भएको हो ।
भिडियोमा नदीमा खसेपछि कुकुरले केहीबेर पानीमाथि टाउको राखेर बाँच्न संघर्ष गरेको देखिन्छ। त्यसपछि कुकुर नदीको तीव्र बहावसँगै बगेको दृश्यसमेत भिडियोमा देखाइएको छ ।
घटना कहिले भएको हो, कुकुर फाल्ने महिला को हुन् र यस्तो कार्य गर्नुको कारण के हो भन्ने विषयमा प्रहरीले अनुसन्धान गरिरहेको जनाएको छ ।
जिल्ला प्रहरी कार्यालय बझाङका डीएसपी टेक जोराले सामाजिक सञ्जालमा भिडियो सार्वजनिक भएपछि प्रहरीको ध्यानाकर्षण भएको बताए ।
उनका अनुसार घटनाको वास्तविकता पत्ता लगाउन र संलग्न व्यक्तिको पहिचान गर्न बुझ्ने काम भइरहेको छ ।
घटनासम्बन्धी भिडियो सामाजिक सञ्जालमा व्यापक रूपमा फैलिँदै गएपछि पशु क्रूरतासम्बन्धी प्रश्नसमेत उठेको छ । प्रहरीले अनुसन्धानपछि घटनाको थप विवरण सार्वजनिक गर्ने जनाएको छ ।
