पहिरोले महाकाली राजमार्ग अवरुद्ध, यात्रु र सवारीसाधन बाटोमै रोकिए
बैतडी— लगातारको वर्षाका बीच बैतडीको महाकाली राजमार्गमा पहिरो खस्दा यातायात सेवा ठप्प भएको छ । दोगडाकेदार गाउँपालिका–५ बिटकममा मंगलबार बिहान ढुङ्गासहितको पहिरो खसेपछि राजमार्ग पूर्ण रूपमा अवरुद्ध भएको हो ।
जिल्ला प्रहरी कार्यालय बैतडीका प्रमुख प्रहरी नायब उपरीक्षक दीपककुमार रायका अनुसार सडकखण्डमाथिबाट बिहान पहिरो खसेपछि राजमार्गमा यातायात आवागमन रोकिएको हो ।
पहिरोले सडक पूर्ण रूपमा ढाकेपछि बैतडी आउने–जाने यात्रु तथा सवारीसाधन बाटोमै रोकिएका छन् । राजमार्ग अवरुद्ध हुँदा यात्रुहरूलाई आवतजावतमा समस्या भएको प्रहरीले जनाएको छ ।
पहिरो हटाएर सडक सञ्चालनमा ल्याउन अहिले जेसिबी प्रयोग भइरहेको प्रहरी नायब उपरीक्षक रायले जानकारी दिए । पहिरो पन्छाउने काम पूरा भएपछि राजमार्गमा यातायात सञ्चालनमा आउने अपेक्षा गरिएको छ ।
वर्षायाममा महाकाली राजमार्गका विभिन्न स्थानमा पहिरो खस्ने गरेका कारण यात्रु तथा सवारी चालकलाई जोखिम मोलेर यात्रा गर्नुपर्ने अवस्था रहँदै आएको छ ।
