एसिसी प्रिमियर कपः समूह विजेता बन्न नेपालले हङकङसँग प्रतिस्पर्धा गर्दै
काठमाडौँ— एसिसी प्रिमियर कप २०२६ को समूह चरणमा अपराजित रहेको नेपाल आज अन्तिम खेलमा हङकङसँग प्रतिस्पर्धा गर्दैछ । लगातार तीन जित निकाल्दै बलियो अवस्थामा रहेको नेपालका लागि यो खेल समूह विजेताको टुंगो लगाउने महत्वपूर्ण अवसर बनेको छ ।
मलेसियामा जारी प्रतियोगिताअन्तर्गत नेपाल र हङकङबीचको खेल क्वालालम्पुरस्थित बायुमास ओभलमा बिहान ७ः१५ बजे सुरु हुनेछ ।
नेपालले समूह चरणका तीनवटै खेल जित्दै ६ अंक जोडेको छ र तालिकाको शीर्ष स्थानमा छ। नेपालले पहिलो खेलमा बहराइनलाई ७ विकेटले पराजित गरेको थियो । त्यसपछि आयोजक मलेसियालाई ६ विकेट तथा साउदी अरेबियालाई ५ विकेटले हराउँदै नेपालले आफ्नो अपराजित यात्रा कायम राखेको हो ।
समूह चरणको अन्तिम खेलमा पनि जित निकाल्दै शीर्ष स्थान सुरक्षित गर्ने लक्ष्यमा नेपाल मैदान उत्रनेछ । प्रतियोगितामा हालसम्म ब्याटिङ र बलिङ दुवै पक्षमा प्रभावशाली प्रदर्शन गरेको नेपाल आत्मविश्वासका साथ हङकङविरुद्ध खेल्ने तयारीमा छ ।
हङकङले भने तीन खेलबाट दुई जित र एक हारसहित ४ अंक जोडेको छ । त्यसैले नेपालविरुद्धको खेल हङकङका लागि पनि महत्वपूर्ण हुनेछ ।
एकदिवसीय क्रिकेटमा नेपाल र हङकङबीच हालसम्म चार पटक प्रतिस्पर्धा भएको छ । तीमध्ये नेपालले एक खेल जित्दा हङकङले दुई खेल आफ्नो पक्षमा पारेको छ । एक खेल भने वर्षाका कारण रद्द भएको थियो ।
यी दुई टोलीबीच पछिल्लो एकदिवसीय भेट सन् २०१८ मा भएको थियो। उक्त खेलमा नेपालले हङकङलाई ५ विकेटले पराजित गरेको थियो ।
अब समूह चरणको अन्तिम खेलमा नेपालले त्यसै प्रदर्शनलाई निरन्तरता दिँदै हङकङविरुद्ध जित निकालेर समूह विजेताका रूपमा अर्को चरणको यात्रा तय गर्ने लक्ष्य राखेको छ ।
