रसुवा भोटेकोशी बाढीः १ हजार ३४१ शव फेला, ७८ शव आफन्तलाई हस्तान्तरण
काठमाडौं— रसुवाको भोटेकोशी क्षेत्रमा आएको विनाशकारी बाढीपछि खोज तथा उद्धार कार्यलाई प्रहरीले निरन्तरता दिएको छ । नेपाल प्रहरीले सार्वजनिक गरेको पछिल्लो विवरणअनुसार बाढीमा परी १ हजार ३४१ जनाको शव फेला परेको छ ।
प्रहरीका अनुसार भदौ २१ गते बिहान ६ः४० बजेसम्म फेला परेका शवमध्ये ८८५२३ जना पुरुष, ३२५ जना महिला र ४९३ जनाको आंशिक अंग रहेका छन् ।
खोज तथा उद्धारका क्रममा ८ हजार ४५१ जनालाई उद्धार तथा उपचारका लागि व्यवस्थापन गरिएको प्रहरीको विवरणमा उल्लेख छ । यसमा ६ हजार ३९१ पुरुष, २ हजार ६ जना महिला र ५४ जना नाबालक छन् ।
६ हजार ५९२ प्रहरी परिचालन
बाढीपछि खोज, उद्धार तथा राहतका लागि नेपाल प्रहरीले ६ हजार ५९२ जना प्रहरी परिचालन गरेको जनाएको छ । उद्धार तथा राहत अभियानका क्रममा ६५ जना प्रहरी प्रभावित भएका छन् भने १५ जना प्रहरी अझै सम्पर्कविहीन रहेको विवरणमा उल्लेख छ ।
यसैगरी विपद्का बेला जोखिम न्यूनीकरण तथा जनचेतना अभिवृद्धिका लागि प्रहरीले ११८ वटा कार्यक्रम सञ्चालन गरी ८२ हजार ३६१ जनालाई सहभागी गराएको जनाएको छ ।
४ हजारभन्दा बढी अझै बेपत्ता
प्रहरीको विवरणअनुसार बाढीपछि ४ हजार ३६ जना बेपत्ता भएको विवरण संकलन गरिएको छ । यसमध्ये ३ हजार ४३८ जना स्वदेशी र ५९८ जना विदेशी नागरिक छन् ।
स्वदेशीतर्फ २ हजार ८६३ पुरुष र ५७५ महिला छन् । विदेशीमध्ये २६१ पुरुष, ३३२ महिला र ५ अन्य रहेको प्रहरीले जनाएको छ ।
७८ शव आफन्तलाई हस्तान्तरण
फेला परेका शवमध्ये हालसम्म ७८ शव आफन्तलाई हस्तान्तरण गरिएको छ । बाँकी शवको पहिचान, व्यवस्थापन तथा आफन्तसँग समन्वयको काम भइरहेको प्रहरीले जनाएको छ ।
पहिचान हुन नसकेका शवको पहिचानका लागि १ हजार २८६ मृतक र १ हजार ११६ जना मृतकका आफन्तबाट डीएनए नमुना संकलन गरिएको छ । यसबाट जम्मा २ हजार ४०२ वटा डीएनए नमुना संकलन भएको प्रहरी विवरणमा उल्लेख छ ।
त्यस्तै, पहिचान हुन नसकेका १ हजार २८७ जनाको विवरण वेबसाइटमा अपलोड गरिएको छ । उद्धार तथा खोजीका क्रममा ३ हजार ९८८ जना होल्डिङ सेन्टरमा राखिएको पनि प्रहरीले जनाएको छ ।
भोटेकोशी क्षेत्रमा आएको बाढीपछि ठूलो मानवीय क्षति भएको भन्दै नेपाली सुरक्षा निकायले खोज तथा उद्धार, शव व्यवस्थापन, पहिचान र बेपत्ताको खोजीलाई निरन्तरता दिइरहेका छन् ।
