पाकिस्तानले भारतमा धार्मिक र सम्प्रदायीक द्वन्द्व भड्काउन खोज्दै- भारतीय विदेशसचिव

गएको राती पाकिस्तानले ४ सय ड्रोनमार्फत भारतको सैन्य पूर्वाधारलाई लक्षित गरी हमला गरेको भारतले दाबी

भारतीय विदेशसचिव विक्रम मिश्रीले पाकिस्तान माथी भारतमा धार्मिक तथा सम्प्रदायीक द्धन्द्ध भडकाउन लागी परेको दावी गरेका छन । गएको २२ तारिखमा भएको पहलगाम आक्रम देखि नै अहिले सम्म पाकिस्तान भरपुर रुपमा सम्प्रदायीक द्धन्द्ध भडकान खोजेको तर भारतीय समाजले सहिष्णुताले त्यसलाई निष्फल पारिएको बताएका छन । गएको मंगलवार राती देखि भारतले पाकिस्तानमा रहेको आतकवादी सेल्टरहरु माथी सुरु गरेको जवाफी आक्रमण वारेमा शुक्रवार आयोजित प्रेस बिफिंगमा मिश्रीले पाकिस्तानमाथि धार्मिक स्थल र विशिष्ट समुदायलाई लक्षित गरी कायरतापूर्ण आक्रमण गरेको आरोप लगाएको छ। बिहीबार राति भारतका विभिन्न सीमावर्ती क्षेत्रमा पाकिस्तानबाट भएको आक्रमणलाई लिएर भारतीय मिश्रीले ती आक्रमणलाई ‘धार्मिक द्वन्द्व भड्काउने नियोजित प्रयास’को संज्ञा दिएका छन्।

विदेश सचिव मिश्रीले भने, “पाकिस्तानले गुरुद्वारा र पुन्च क्षेत्रका नागरिक क्षेत्रमा हमला गरेर साम्प्रदायिक सौहार्दमाथि प्रत्यक्ष प्रहार गरेको छ। यो कायरताको पराकाष्टा हो।”

उनले पाकिस्तानले विश्व समुदायलाई भ्रमित पार्ने नियतले मिथ्या सूचना फैलाइरहेको आरोप पनि लगाए। उनका अनुसार पाकिस्तानका मन्त्रीहरू स्वयंले झूटो प्रचार गर्दै अन्तर्राष्ट्रिय धारणा तोडमोड गर्ने प्रयास गरिरहेका छन्।

भारतका अनुसार विहीबार राति पाकिस्तानले पश्चिमी सीमावर्ती क्षेत्रका ३६ स्थानमा आक्रमण गरेको छ। टर्कीमा निर्मित हतियार प्रयोग गरी कन्धार, उरी, पुन्च, मेन्धर, राजौरी, अख्नुर र उधमपुरमा लक्षित आक्रमण गरिएको थियो। कर्नेल सोफिया कुरैशीका अनुसार ती हमलामा केही सुरक्षाकर्मी घाइते भएका छन् भने भारतको जवाफी कारबाहीमा पाकिस्तानले सैन्य क्षति बेहोर्नुपरेको दाबी गरिएको छ। पाकिस्तानीले त्यसक्रममा ३ देखि ४ सय सम्म ड्रोनमार्फत भारतको सैन्य पूर्वाधारलाई लक्षित गरी हमला गरेको भारतले दाबी गरेको छ।

भारतले पाकिस्तानले प्रहार गरेका थुप्रै ड्रोनलाई खसालिएको र आक्रमणको क्रममा पाकिस्तानले आफ्नो व्यवसायिक उडानलाई ढालका रूपमा प्रयोग गरेको आरोप पनि लगाएको छ।

विदेश सचिव मिश्रीले अन्तर्राष्ट्रिय समुदायलाई पाकिस्तानको व्यवहारप्रति सचेत रहन आग्रह गर्दै क्षेत्रीय स्थायित्वका लागि ठोस कदम चाल्न आग्रहसमेत गरेका छन्।

पाकिस्तानी सेनाले बिहीबार राति सैन्य पूर्वाधारहरूलाई निशासना गरी ड्रोन हमला गरेको भारतीय सेनाकी कर्णेल सोफिया कुरैशीलाई उदृत गर्दै भारतीय सञ्चारमाध्यमहरूले जनाएका छन्। कर्णेल सोफियाले भनिन्, ‘लेहदेखि सरक्रिकसम्मका ३६ स्थानमा ३०० देखि ४०० ड्रोन हमलाको प्रयास भएको थियो। भारतीय सुरक्षा बलले काइनेटिक र गैरकाइनेटिक माध्यमबाट त्यसमध्ये धेरै ड्रोनहरूलाई खसाल्न सफल भयो।’

ड्रोन मार्फत पाकिस्तानले भारतको वायु रक्षा प्रणाली परीक्षण गर्न र गुप्तचरबारे जानकारी संकलन गर्न खोजेको भारतको आरोप छ। भारतीय सेनाका अनुसार ड्रोनको भग्नावशेषको फोरेन्सिक जाँच भइरहेको छ। प्रारम्भिक अनुसन्धानले यी ड्रोनहरू टर्कीमा निर्मित भएको भारतले आशंका गरेको छ।

‘पाकिस्तान तर्फबाट सीमामा भारी गोलाबारी भइरहेको छ। यस गोलाबारीबाट केही भारतीय सेनाका सैनिकहरू मारिएका छन्। भारतको जवाफी कारबाहीमा पाकिस्तानले ठूलो क्षति बेहोरेको छ,’ उनले भनिन्।