भारत–नेपाल साँस्कृतिक सम्बन्ध झल्काउने गरि होलीको पूर्वसन्ध्यामा पोखरामा ओडिसी नृत्य कार्यक्रम – Nepalboli

भारत–नेपाल साँस्कृतिक सम्बन्ध झल्काउने गरि होलीको पूर्वसन्ध्यामा पोखरामा ओडिसी नृत्य कार्यक्रम

   १० चैत्र २०८०, शनिबार  

भारत र नेपालको समृद्ध साँस्कृतिक सम्पदा मनाउन पोखरामा भारतीय शास्त्रीय ओडिसी नृत्य र नेपाली लोक नृत्य प्रस्तुत गर्दै एक साँस्कृतिक कार्यक्रमको आयोजना गरियो । भारतीय राजदूतावास, काठमाडौंस्थित स्वामी विवेकानन्द साँस्कतिक केन्द्र, नेपाल पर्यटन बोर्ड र पोखरा पर्यटन परिषद्ले उक्त कार्यक्रमको आयोजना गरेको थियो ।

उक्त कार्यक्रममा गण्डकी प्रदेशका माननीय मुख्यमन्त्री सुरेन्द्रराज पाण्डे प्रमुख अतिथिको रुपमा उपस्थित हुनुहुन्थ्यो । कार्यक्रममा गण्डकी प्रदेश सरकार र कास्की स्थानीय सरकारका विशिष्ट व्यक्तिहरुको समेत उपस्थिति रहेको थियो । माननीय मुख्यमन्त्री पाण्डेले नेपाल र भारतबीच धेरै साँस्कृतिक समानता रहेको र यस कार्यक्रमले दुई देशको विविधतालाई देखाउन मद्दत गरेको उल्लेख गर्नुभयो ।

भारतीय राजदूतावासका प्रथम सचिव श्री अविनाश सिंहले भारत र नेपालबीचको सदियौं पुरानो साँस्कृतिक सम्बन्ध बारे बताउदै पोखरालाई नेपालको पर्यटन राजधानी घोषणा गरेकोमा स्वागत गर्नुभयो ।

श्रितकमला, सखी हे, दशावतार र वसन्त बहार, वसन्तको रंग प्रस्तुत गर्दै भारतीय शास्त्रीय नृत्यको कठिन चाल तथा भावभङ्गीमा ओडिसी नृत्यमार्फत कार्यक्रममा देखाइएको थियो ।लाखे नृत्यसँगै नेपाली लोक नृत्यको नेतृत्व श्री निश्कल उदासले गर्नुभएको थियो । वहाँलाई सङ्गीतकार निशान श्रेष्ठ, विशेष ताम्राकार, सम्बोधी उदास, सम्राट भारी र आयुष श्रेष्ठले साथ दिनुभएको थियो । बाराही घाट लेकसाइड पोखरामा आयोजित उक्त कार्यक्रममा ५०० भन्दा बढी मानिसको उपस्थिति थियो ।

काकली बोसको नेतृत्वमा रहेको ओडिसी नृत्य टोलीले २०८० चैत्र ९ गते काठमाडौंमा आफ्नो प्रस्तुति प्रस्तुत गरेको थियो । यस कार्यक्रमपश्चात टोलीले चैत्र ११ गते लुम्बिनी, चैत्र १३ गते वीरगंज र चैत्र १४ गते धरानमा प्रस्तुति दिने कार्यक्रम रहेको छ ।

फेसबुकबाट तपाईको प्रतिक्रिया सबै