कांग्रेस महाधिवेशनको दोस्रो दिन: बन्दसत्रसँगै निर्वाचन प्रक्रिया अघि बढ्दै
काठमाडौँ— नेपाली कांग्रेसको १५औँ महाधिवेशनको दोस्रो दिन आज पार्टीको नीति, राजनीतिक प्रतिवेदनदेखि नयाँ नेतृत्व चयनको प्रारम्भिक निर्वाचन प्रक्रियासम्मका गतिविधि अघि बढ्ने भएका छन् ।
महाधिवेशनको उद्घाटन सत्र आइतबार सम्पन्न भएपछि आज बिहान ९ बजेबाट बन्दसत्र सुरु हुँदैछ । बन्दसत्रमा सभापति गगन थापा र उपसभापति विश्वप्रकाश शर्माले राजनीतिक तथा समसामयिक विषय समेटिएका प्रतिवेदन प्रस्तुत गर्ने कार्यक्रम छ ।
बन्दसत्रसँगै कांग्रेसको नयाँ केन्द्रीय कार्यसमिति चयनका लागि निर्वाचनसम्बन्धी प्रक्रिया पनि आजैबाट सुरु हुनेछ । निर्वाचन समितिले सार्वजनिक गरेको कार्यतालिकाअनुसार साँझ ५ बजे महाधिवेशनका मतदाताको प्रारम्भिक नामावली प्रकाशन गरिनेछ ।
प्रकाशित नामावलीमाथि दाबी–विरोधका लागि साँझ ६ः३० बजेसम्मको समय तोकिएको छ। त्यसपछि प्राप्त दाबी–विरोधमाथि निर्वाचन समितिले ७ः३० बजेसम्म छानबिन गर्नेछ ।
छानबिन प्रक्रिया पूरा भएपछि आजै राति ८ः३० बजे मतदाताको अन्तिम नामावली प्रकाशन गरिने निर्वाचन समितिले जनाएको छ ।
यससँगै कांग्रेस महाधिवेशन उद्घाटनको औपचारिक चरणबाट नेतृत्व चयनको प्रतिस्पर्धातर्फ प्रवेश गर्नेछ । सोमबारको गतिविधिले आगामी निर्वाचनमा सहभागी हुने मतदाताको अन्तिम टुंगो लगाउने भएकाले महाधिवेशनको दृष्टिले आजको दिनलाई महत्वपूर्ण मानिएको छ ।.
