प्राकृतिक खेतीसम्बन्धी तालिमका लागि ५० नेपाली कर्मचारी भारत प्रस्थान
काठमाडौं— प्राकृतिक तथा दिगो खेतीसम्बन्धी पाँचदिने प्रशिक्षण कार्यक्रममा सहभागी हुन ५० जना नेपाली कर्मचारीको टोली भारत प्रस्थान गरेको छ ।
भारतीय राजदूतावास काठमाडौंका अनुसार कृषि क्षेत्रमा कार्यरत नेपाली अधिकारीहरूको तेस्रो ब्याच बुधबार भारत प्रस्थान गरेको हो । टोलीले भारतको कुशीनगरस्थित गुरुकुलमा असोज १३ देखि १७ गतेसम्म प्राकृतिक खेतीसम्बन्धी प्रशिक्षण लिनेछ ।
भारत सरकारको पूर्ण प्रायोजनमा सञ्चालन भइरहेको उक्त प्रशिक्षण कार्यक्रमअन्तर्गत यसअघि पहिलो र दोस्रो ब्याचका नेपाली अधिकारीले क्रमशः सेप्टेम्बर २०२५ र अगस्ट २०२५ मा प्रशिक्षण पूरा गरिसकेका छन् ।
प्रशिक्षणमा प्राकृतिक तथा दिगो खेतीका अभ्यासमा नेपाली अधिकारीहरूको ज्ञान, सीप तथा क्षमता अभिवृद्धि, प्राकृतिक खेती प्रविधिमा व्यावहारिक अनुभव तथा दिगो कृषिका उत्कृष्ट अभ्यासबारे आदान–प्रदान गराइने भारतीय राजदूतावासले जनाएको छ ।
राजदूतावासका अनुसार कार्यक्रमले कृषि क्षेत्रमा भारत र नेपालबीचको दीर्घकालीन साझेदारी तथा दिगो र वातावरणमैत्री कृषि अभ्यासलाई प्रवर्द्धन गर्ने उद्देश्य राखेको छ ।
