उच्चस्तरीय राजनीतिक संयन्त्र गठनको तयारी, रविले बोलाए सर्वदलीय बैठक
काठमाडौं— सत्तारुढ राष्ट्रिय स्वतन्त्र पार्टी (रास्वपा)का सभापति रवि लामिछानेले उच्चस्तरीय राजनीतिक संयन्त्र गठनको विषयमा छलफल गर्न सर्वदलीय बैठक बोलाएका छन् ।
रास्वपा प्रवक्ता जगदीश खरेलका अनुसार बैठक बुधबार बिहान ११ बजे सिंहदरबारस्थित रास्वपा संसदीय दलको कार्यालयमा बस्नेछ ।
बैठकमा पछिल्लो राजनीतिक परिस्थितिबीच उच्चस्तरीय राजनीतिक संयन्त्र गठन गर्ने विषयलाई मुख्य एजेन्डा बनाइएको छ । संयन्त्रको स्वरूप, आवश्यकता र त्यसमा सहभागी दलका विषयमा समेत छलफल हुने बताइएको छ ।
यसैगरी, पछिल्लो समय देखिएका विपद्का घटनाबाट उत्पन्न परिस्थितिमा विपद् जोखिम न्यूनीकरण तथा व्यवस्थापनलाई प्रभावकारी बनाउने विषयमा पनि दलहरूबीच छलफल गरिने प्रवक्ता खरेलले जानकारी दिए ।
सर्वदलीय बैठकमा विभिन्न राजनीतिक दलका प्रतिनिधिको सहभागिता रहने अपेक्षा गरिएको छ । बैठकले राजनीतिक समन्वयसँगै विपद् व्यवस्थापनमा दलहरूबीच साझा धारणा निर्माण गर्ने प्रयास गर्ने रास्वपाको तयारी छ ।
