एसिया कपको लक्ष्यसहित नेपालले बहराइनविरुद्ध सुरु गर्यो प्रिमियर कपको यात्रा
काठमाडौं— एसिया कपमा दोस्रोपटक स्थान बनाउने लक्ष्यसहित नेपालले एसीसी मेन्स प्रिमियर कपमा विजयी सुरुवातको प्रयास थालेको छ । मलेसियामा जारी प्रतियोगिताअन्तर्गत पहिलो खेलमा नेपालले बहराइनविरुद्ध टस जितेर पहिले फिल्डिङ रोजेको हो ।
बहराइनले ब्याटिङ सुरु गरिसकेको छ भने नेपालले एक विकेट हात पारिसकेको छ ।
प्रतियोगिताको उपाधि जित्ने टोली एसिया कपका लागि छनोट हुनेछ । नेपाल यसपटक सन्दीप लामिछानेको कप्तानीमा मैदानमा उत्रिएको छ । यसअघि एकदिवसीय टोलीको नेतृत्व गर्दै आएका रोहित पौडेलको स्थानमा सन्दीपले कप्तानी सम्हालेका हुन् ।
नेपालले प्रतियोगिताअघि भारतमा करिब डेढ साता अभ्याससमेत गरेको थियो । समूह ‘ए’ मा रहेको नेपालले बहराइनसँगै साउदी अरेबिया, मलेसिया र हङकङसँग प्रतिस्पर्धा गर्नेछ । समूहका शीर्ष दुई टोली सेमिफाइनलमा पुग्नेछन् ।
सन् २०२३ मा नेपालमै भएको प्रिमियर कपको फाइनलमा यूएईलाई पराजित गर्दै नेपालले पहिलोपटक उपाधि जितेको थियो । त्यससँगै नेपाल पहिलोपटक एसिया कपमा छनोट भएको थियो ।
यसपटक पनि उपाधि जित्दै एसिया कपमा लगातार दोस्रोपटक स्थान बनाउने लक्ष्यमा नेपाली टोली रहेको छ ।
