भारतीय राजदूत दलेलासँग परराष्ट्रमन्त्री खनालको भेट, सम्बन्ध थप गहिरो बनाउने विषयमा छलफल
काठमाडौं— परराष्ट्रमन्त्री शिशिर खनालले नेपालका लागि भारतका नवनियुक्त राजदूत सुधाकर दलेलासँग भेटवार्ता गर्दै दुई देशबीचको सम्बन्धलाई थप सुदृढ र गहिरो बनाउने विषयमा छलफल गरेका छन् ।
सिंहदरबारस्थित परराष्ट्र मन्त्रालयमा आज भएको शिष्टाचार भेटमा मन्त्री खनालले राजदूत दलेलालाई नयाँ जिम्मेवारीका लागि बधाई दिँदै सफल तथा फलदायी कार्यकालको शुभकामना व्यक्त गरे ।
भेटमा नेपाल र भारतबीच लामो समयदेखि रहँदै आएको ऐतिहासिक तथा मैत्रीपूर्ण सम्बन्धलाई आगामी दिनमा थप मजबुत बनाउने विषयमा कुराकानी भएको परराष्ट्र मन्त्रालयले जनाएको छ ।
दुई देशबीचको सहकार्यलाई थप प्रभावकारी बनाउँदै आपसी सम्बन्धलाई नयाँ उचाइमा पुर्याउने विषयमा भेटवार्ता केन्द्रित रहेको मन्त्रालयको भनाइ छ ।
नवनियुक्त भारतीय राजदूत दलेलाको नेपालमा कार्यकाल सुरु भएपछि परराष्ट्रमन्त्रीसँग भएको यो भेटलाई दुई देशबीचको नियमित कूटनीतिक सम्पर्कका रूपमा हेरिएको छ ।