मधेशका मुख्यमन्त्री यादवले पाए विश्वासको मत
काठमाडौ- मधेस प्रदेशका मुख्यमन्त्री कृष्ण प्रसाद यादवले प्रदेश सभाबाट विश्वासको मत प्राप्त गरेका छन् । शुक्रबार बसेको प्रदेश सभा बैठकमा उनले संविधानअनुसार विश्वासको मत लिएका हुन् । नेपालको संविधानको धारा १८८ को उपधारा (२) तथा प्रदेश सभा कार्यसञ्चालन नियमावली, २०७५ अन्तर्गतको व्यवस्था अनुसार गरिएको मतदानमा मुख्यमन्त्री यादवको पक्षमा बहुमत पुगेको हो ।
सभामुख राम आशिष यादवका अनुसार बैठकमा उपस्थित १०० सांसदमध्ये ६२ जनाले विश्वासको मतको पक्षमा मतदान गरेका थिए भने ३६ मत विपक्षमा परेको थियो । हाल मधेस प्रदेश सभामा १०२ सदस्य कायम रहेका छन् । विभिन्न कारणले केही सदस्य निलम्बनमा रहेका तथा केहीले राजीनामा दिएका कारण प्रभावकारी सदस्य संख्या घटेको छ । सभामुखको मत गणनामा समावेश नहुने संवैधानिक व्यवस्थासमेत लागू भएको छ ।
मुख्यमन्त्री यादवको पक्षमा नेपाल कम्युनिस्ट पार्टी (एमाले) का २४, नेपाली काँग्रेसका २२, नेपाल कम्युनिस्ट पार्टीका १४ तथा नेपाल संघीय समाजवादी पार्टीका एक सांसदले मतदान गरेका थिए ।
त्यसैगरी विपक्षमा जनता समाजवादी पार्टी, नेपाल का २५, जनमत पार्टी का १२, राष्ट्रिय प्रजातन्त्र पार्टी तथा नागरिक उन्मुक्ति पार्टीका एक-एक सांसद उभिएका थिए ।
वैशाख २२ गते जनमत पार्टीले सरकारलाई दिएको समर्थन फिर्ता लिएपछि मधेस सरकार अल्पमतमा परेको थियो । त्यसपछि जेठ १ गते विश्वासको मत लिने प्रयास सफल हुन सकेको थिएन । त्यतिबेला सत्ता गठबन्धनभित्र मत विभाजन हुने आशंका देखिएको थियो ।
बिहीबार राति एमाले सरकारमा सहभागी हुने सहमति भएपछि मधेस प्रदेशको राजनीतिक समीकरण परिवर्तन भएको हो । नयाँ गठबन्धनअनुसार एमाले, काँग्रेस र नेकपाको संयुक्त समर्थनमा सरकार कायम भएको छ । यसक्रममा मोहम्मद समीर एमालेको तर्फबाट विना विभागीय मन्त्रीका रूपमा सरकारमा सहभागी भइसकेका छन् ।
