नेकपा (एस) र जसपा विच एकता गर्न जसपाद्धारा वार्ता समिति गठन – Nepalboli

नेकपा (एस) र जसपा विच एकता गर्न जसपाद्धारा वार्ता समिति गठन

   १९ पुष २०७९, मंगलवार  

जनता समाजवादी पार्टी (जसपा) नेपालले राजनीतिक दल र सङ्गठनहरुसँग एकता सम्बन्धमा वार्ता गर्नका लागि राजेन्द्र श्रेष्ठको संयोजकत्वमा तीन सदस्यीय वार्ता समिति गठन गरेको छ ।  दुई दिनदेखि जारी राजनीतिक समितिको बैठकले सो समिति गठन गरेको हो ।

सो समितिको सदस्यहरुमा रकम चेमजोङ र गोविन्द चौधरी रहेका छन् । जसपाले पछिल्लो केहि समय यता नेकपा एकीकृत समाजवादी पार्टीसँग एकताका लागि पहल थालेको छ । जसपाका अध्यक्ष उपेन्द्र यादवले नेकपा (एस) सँग एकताबारे अनौपचारिक छलफल गरिरहेका छन ।

त्यस्तै, सङ्घीय परिषद् र केन्द्रीय सदस्यहरूको भूमिकाबारे छानबिन गर्नका लागि शिवलाल थापा मगरको संयोजकत्वमा पाँच सदस्यीय समिति गठन गरिएको जसपाका प्रवक्ता मनिष सुमनले जानकारी गराए । समितिमा देवबहादुर दुरा, बालकिशोर यादव, अशोक लगरवार र प्रमीला यादव छन् ।

पार्टी अधिवेशनका लागि जसपाको विधान मस्यौदा गर्न अध्यक्ष उपेन्द्र यादवको नेतृत्वमा नौ सदस्यीय विधान मस्यौदा समिति गठन पनि भएको छ । सो समितिमा राजेन्द्र श्रेष्ठ, रकम चेमजोङ्ग, सुशीला श्रेष्ठ, शिवलाल थापा मगर, लालबाबु राउत, दीपेन्द्र झा, दीपक राई, पञ्चलाल महर्जन, वीरेन्द्र ठाकुर र भगवती सुवेदी रहेका छन् ।

त्यसका साथै निर्वाचनमा पार्टीको आधिकारिक उम्मेदवारविरुद्ध उम्मेदवारी दिने तथा आफ्नै उम्मेदवारमाथि अन्तर्घात गर्नेलाई सम्बन्धित समितिहरूबाटै कारबाही गर्ने निर्णय पनि भएको उनले बताए ।

फेसबुकबाट तपाईको प्रतिक्रिया सबै