घाइते अवस्थामा पनि यात्रु बचाउन उठे क्याप्टेन स्मित, मोदीसँग भने– ‘उनीहरूलाई मर्न दिनु हुँदैन’

काठमाडौँ— भारतीय प्रधानमन्त्री नरेन्द्र मोदीले फ्लाईदुबईका पाइलट क्याप्टेन स्मित मच्छरसँग टेलिफोन संवाद गर्दै उनको साहस र निर्णय क्षमताको प्रशंसा गरेका छन् । गम्भीर घाइते अवस्थामा समेत यात्रुको सुरक्षालाई प्राथमिकता दिएको भन्दै मोदीले उनको शीघ्र स्वास्थ्यलाभको कामना गरेका हुन् ।

टेलिफोन कुराकानीका क्रममा मोदीले क्याप्टेन स्मितको स्वास्थ्यलाभका लागि भारतका विभिन्न स्थानमा प्रार्थना तथा महामृत्युञ्जय मन्त्र जाप भइरहेको बताए। उनले स्मितको साहस र सूझबुझले धेरै मानिसको ज्यान जोगिएको उल्लेख गरे ।

मोदीले भने, ‘पूरै देश तपाईंको स्वास्थ्यलाभका लागि प्रार्थना गरिरहेको छ। तपाईंको साहस, धैर्य र सूझबुझले धेरै मानिसको ज्यान जोगिएको छ ।’

क्याप्टेन स्मितले दुर्घटनाका बेला आफू लडेर गम्भीर घाइते भएको मोदीलाई बताए । चोटका कारण आफू तलै रहेको भए पनि विमानभित्रको अवस्था बिग्रँदै गएको महसुस भएपछि उठेर आवश्यक कदम चाल्नुपर्ने निष्कर्षमा पुगेको उनले सुनाए ।

‘म १७ वर्षदेखि विमान उडाउँदै आएको छु र पछिल्ला ११ वर्षदेखि क्याप्टेन छु । विमानभित्र के भइरहेको छ भन्ने मलाई राम्रोसँग थाहा हुन्छ । म तल लडिरहेको अवस्थामा पनि परिस्थिति बिग्रिँदै गएको महसुस भइरहेको थियो,’ उनले भने ।

उनका अनुसार अन्तिम प्रयास गर्दै ककपिटको ढोका खोल्न सफल भएपछि अन्य व्यक्तिहरू पनि त्यहाँ प्रवेश गर्न सकेका थिए । उक्त प्रयासमा अरू व्यक्तिहरूको समेत महत्वपूर्ण सहयोग रहेको उनले बताए ।

‘म आफ्नो ज्यान बचाउने हिसाबले अघि बढिरहेको थिएँ। तर त्यही समयमा ती मानिसहरूलाई मर्न दिनु हुँदैन भन्ने मलाई थाहा थियो,’स्मितले भने ।

पीडामा हनुमान चालिसा

कुराकानीका क्रममा क्याप्टेन स्मितले कठिन अवस्थामा आफूलाई हनुमान चालिसाले मानसिक बल दिएको बताए ।

जब पनि मलाई पीडा हुन्छ, म हनुमान चालिसा पढिरहेको हुन्छु। मलाई थाहा छ, भगवानले नै मलाई बचाउनुभएको हो,’ उनले भने ।

आफ्ना चोटलाई उनले केवल घाउका रूपमा नभई क्रमशः निको हुँदै जाने यात्राका रूपमा लिएको बताए । आफू पूर्ण रूपमा स्वस्थ हुने विश्वास पनि उनले व्यक्त गरे ।

परिवारको पनि प्रशंसा

प्रधानमन्त्री मोदीले स्मितका बुवा भूपेन्द्रभाइ, आमा गीताबेन र पत्नी सोनलबेनसँग भएको कुराकानीको प्रसंग पनि उठाए । उनले स्मितलाई दिएको संस्कारका लागि आमाको प्रशंसा गर्दै पत्नी सोनलबेनको साहस र संयमको समेत सराहना गरे ।

मोदीका अनुसार सावरकुन्डलासहित भारतका विभिन्न स्थानमा क्याप्टेन स्मितको शीघ्र स्वास्थ्यलाभ र दीर्घायुका लागि पूजाआजा भइरहेको छ ।

उनले क्याप्टेन स्मितको उपचार तथा हेरचाहमा सहयोग गरेको साउदी अरब र यूएई सरकारलाई धन्यवाद दिँदै आवश्यक परेको अवस्थामा आफू एक फोनको दूरीमा रहेको बताएका छन् ।