रसुवा बाढीः विद्युत् प्राधिकरणका आयोजनामा कार्यरत १९६ जना सम्पर्कविहीन
काठमाडौं— रसुवामा आएको विनाशकारी बाढीपछि नेपाल विद्युत् प्राधिकरणका विभिन्न आयोजना तथा संरचनामा कार्यरत १९६ जना सम्पर्कविहीन भएका छन् । निर्माणाधीन तथा सञ्चालनमा रहेका जलविद्युत् आयोजना र सबस्टेसनमा कार्यरत कर्मचारी तथा कामदारको अवस्था अझै यकिन हुन सकेको छैन ।
प्राधिकरणका अनुसार निर्माणाधीन त्रिशूली–३ ‘बी’ जलविद्युत् आयोजनाका २१ जना कर्मचारी सम्पर्कमा छैनन् । त्यस्तै, चिलिमे पावर प्लान्टका ६ र आवास क्षेत्रका एक कर्मचारी पनि सम्पर्कविहीन छन् ।
चिलिमे जलविद्युत् कम्पनीबाट त्रिशूली–३ ‘बी’मा कार्यरत ११ जना, रसुवागढी जलविद्युत् आयोजनाका ९२ जना तथा त्रिशूली–३ ‘ए’को पावरहाउसमा कार्यरत ४५ जना पनि सम्पर्कविहीन रहेको जनाइएको छ ।
यसैगरी, त्रिशूली र देवीघाट जलविद्युत् आयोजनामा कार्यरत एक–एक जना, चिलिमे स्विचयार्डका एक कर्मचारी र सोही वितरण केन्द्रका एक मिटर रिडरको समेत सम्पर्क हुन सकेको छैन ।
त्रिशूली २२० केभी ३ ‘बी’ हब सबस्टेसनमा कार्यरत ठेकेदारका १६ जना कामदार पनि सम्पर्कविहीन रहेको प्राधिकरणले जनाएको छ ।
यसैबीच, निजी क्षेत्रबाट निर्माण अघि बढाइएका जलविद्युत् आयोजनाका कर्मचारी तथा कामदारसमेत बाढीपछि सम्पर्कविहीन भएका छन् ।
२१६ मेगावाटको अपर त्रिशूली–१ जलविद्युत् आयोजनामा कार्यरत आठ कोरियन नागरिक र १० जना नेपाली कर्मचारी८८ सम्पर्कमा छैनन् । यस्तै, २० मेगावाटको लाङटाङ खोला जलविद्युत् आयोजनाका २५ कर्मचारी र ३५ कामदार पनि सम्पर्कविहीन रहेका छन् ।
बाढी प्रभावित क्षेत्रमा सञ्चार तथा सडक सम्पर्क अवरुद्ध भएकाले सम्पर्कविहीन कर्मचारी तथा कामदारको अवस्था यकिन गर्न कठिनाइ भइरहेको छ । सुरक्षा निकाय तथा सम्बन्धित आयोजनाहरूले खोजी तथा उद्धारको प्रयास जारी राखेका छन् ।
