चिनियाँ राजदूतको कूटनीतिक मर्यादा विपरित अभिव्यक्तको संसदीय समितिमा आलोचना
संसदको अन्तर्राष्ट्रिय सम्बन्ध समितिको बिहिवार बसेको बैठकमा हालै नेपालका लागी चिनियाँ राजदूतको एक अभिव्यक्तिलाई लिएर संसदहरुले चिनियाँ राजदूतको आलोचना गरेका छन । परराष्टमन्त्री समेतको सहभागीतामा आज बसेको समितिको बैठकमा नेकपा माओवादी केन्द्रका उपमहासचिव वर्षमान पुन ‘अनन्त’ले नेपालको आन्तरिक मामिलामा टिप्पणी गर्ने छुट कुनै पनि कूटनीतिज्ञहरुलाई नभएको बताएका छन् ।उनले नेपालको घरेलु मामिलामा टिप्पणी गर्नेहरुलाई सरकारले सचेत गराउनु पर्ने समेत बताए ।
संसदको अन्तर्राष्ट्रिय सम्बन्ध समितिको आजको बैठकमा उनले भने, ‘को राजदूतले, कहाँको राजदूतले भन्योभन्दा पनि हाम्रो आन्तरिक मामिलामा कसैले पनि टिप्पणी गर्ने या कोही छिमेकसँग या तेस्रो पक्षसँग नेपालको सम्बन्धको विषयमा अरुले टिप्पणी गर्ने परम्परा बसाल्न दिनै हुँदैन । यो बेठिक हो, अन्तर्राष्ट्रिय कूटनीतिमा पनि र हाम्रो कूटनीतिमा पनि ।’
नेपालका लागि चिनियाँ राजदूतले हालैमात्र नेपाल–भारत व्यापारका विषयमा कडा टिप्पणी गरेका थिए, जसलाई कूटनीतिक मामलाका जानकारहरुले ‘गैरकूटनीतिक अभिव्यक्ति’ भनेर आलोचना गरेका छन् ।
माओवादी केन्द्रमा उपमहासचिव पुनले चिनियाँ राजदूतको नाम नलिई भने ‘यो हाम्रो घरेलु विषय हो, हाम्रो सम्बन्धको विषय हो । सही गलत हामी सम्बन्धित पक्षसँग कुरा गर्छौं । त्यसमा परराष्ट्र मन्त्रालयलाई सतर्क बनाउने या कुनै सन्दर्भमा स्पष्टीकरण लिने या के गर्ने हो मन्त्रालयले सरकारले यसमा पहल गरोस् ।’
पुनले नेपालको सम्बन्धको विषयमा अरुले टिप्पणी गर्ने परम्परा बसाल्नै दिन नहुने बताउँदै उनले भने, ‘हामी हाम्रो घर परिवारसँग के गर्छौं, कसरी घर परिवार मिलाउँछौं, हामी हाम्रो छिमेकसँग के गर्छौं, अर्को साथीसँग के गर्छौं, तेस्रो पक्षलाई साचो हुनुहुँदैन ।’
बैठकमा राष्ट्रिय स्वतन्त्र पार्टी (रास्वपा) का नेता शिशिर खनालले नेपालका लागि चीनका राजदूतले दिएको गैरकूटनीतिक अभिव्यक्तिलाई नजरअन्दाज गरियो भने त्यसले थप असहजता सिर्जना हुनसक्ने समेत बताए ।
बैठकमा आम जनता पार्टीका अध्यक्ष प्रभु साहले चिनियाँ राजदूतको अभिव्यक्तिको विषयमा उनले माफी मागे माफी दिनुपर्ने र भविष्यमा नदोहोरिने सुनिश्चित गर्नुपर्ने बताए ।
