समृद्धिका लागि एकजुट हुनु जनप्रतिनिधिको दायित्व
राष्ट्रपति रामचन्द्र पौडेलले निर्वाचनमार्फत जनताले प्रकट गरेको स्वतन्त्रता, सामाजिक न्याय, सुशासन र समृद्धिको आकाङ्क्षा पूरा गर्ने ठूलो दायित्व अब जनप्रतिनिधिहरूको काँधमा आएको बताउनुभएको छ। निर्वाचन आयोग नेपालले बुधबार राजधानीमा आयोजना गरेको विशेष कार्यक्रमलाई सम्बोधन गर्दै राष्ट्रपति पौडेलले सो धारणा व्यक्त गर्नुभएको हो।
सम्बोधनका क्रममा राष्ट्रपति पौडेलले लोकतन्त्रमा राजनीतिक विचार र मतहरू फरक हुनु स्वाभाविक भए पनि राष्ट्र निर्माणको महाअभियानमा सबैको ऐक्यबद्धता हुनुपर्नेमा जोड दिनुभयो। लोकतन्त्रमा मत फरक हुन सक्छन्, तर राष्ट्र निर्माणको साझा लक्ष्यमा सबै नेपालीको एउटै मत हुनेछ भन्ने मैले विश्वास लिएको छु, उहाँले भन्नुभयो।
राष्ट्रपति पौडेलले सङ्घीय लोकतान्त्रिक गणतन्त्रको मूल मर्म नै जनताको जीवनस्तर माथि उठाउनु रहेको उल्लेख गर्दै मुलुकलाई समृद्ध बनाउने कार्यमा एकजुट भएर लाग्न सबैमा हार्दिक आह्वान समेत गर्नुभयो।
निर्वाचनलाई लोकतन्त्रको मेरुदण्डका रूपमा चित्रण गर्दै राष्ट्रपतिले नेपाली नागरिकको उत्साहपूर्ण सहभागिताले लोकतान्त्रिक प्रणालीलाई थप सुदृढ तुल्याएको उल्लेख गर्नुभयो। उहाँले भन्नुभयो, लोकतन्त्रले प्रदान गरेको प्रतिनिधि चुन्ने अधिकारको प्रयोगमार्फत नागरिकले हाम्रो प्रणालीप्रतिको अटुट विश्वासलाई पुनः पुष्टि गरेका छन्। मतदाताको मतादेशले मुलुकको भविष्यलाई नयाँ दिशा निर्देश गरेको छ।
