६ माग राख्दै नागरिक आन्दोलनले घोषणा गर्यो नागरिक जागरण कार्यक्रम
बृहत् नागरिक आन्दोलनका तर्फबाट मंगलबार काठमाडौंमा खगेन्द्र संग्रौला, कृष्ण खनाल, रामजी राम र निरन्ती तुम्वापोले शक्तिशाली नागरिक जागरण जरुरी भएको मत मत राखेका छन । प्रजातन्त्र दिवसको पूर्वसन्ध्यामा ६ बुँदे माग राख्दै वक्तव्य जारी गरेका उनीहरूले अबको नागरिक आन्दोलन नेताराजका विरुद्ध अघि बढ्ने उद्घोष गरे । लेखक खगेन्द्र संग्रौलाले भने, ‘नागरिक आन्दोलन नेताहरूका विरुद्धमा होइन, नेताराजका विरुद्धमा हो । उनीहरूले देखाएको व्यक्तिवादी आचरण र जनतालाई पटक्कै नगन्ने प्रवृत्तिविरुद्ध हो ।’
मार्टिन चौतारीमा पत्रकार तथा नागरिक अगुवाहरूबीच संग्रौलाले यसअघिका नागरिक आन्दोलनहरू लोकतन्त्र पुनर्स्थापना तथा नागरिकका प्रतिनिधिलाई जवाफदेही बनाउन भए पनि तिनीहरूलाई उपेक्षा गरिएको बताए । उनले जागरुक नागरिकलाई आफ्ना आवाज उठाउन पनि अपिल गरे ।
राजनीतिशास्त्री कृष्ण खनालले दलीय व्यवस्थामा दलहरू नै यसका चालक हुने भन्दै उनीहरूलाई पारदर्शी, जवाफदेही तथा नागरिकमूखी बनाउन आफूहरूले अभियान थालेको बताए ।खनालले भने, ‘दलहरूभित्र ठूलो गडबडी छ । आफ्नो पार्टीको भोट ठूलो अनुपातमा घट्दा पनि जिम्मेवारीको बोध छैन ।
‘आन्दोलनको वैचारिक तयारी स्वरुप फागुनमा विभिन्न नागरिक समूह र सरोकारवालाहरूसित भेटिरहेका छौं,’ उनले भने, ‘वैचारिक, भौतिक र अन्य किसिमका ब्यापक तयारी सकिएपछि चैत्रमा आन्दोलनलाई तीब्रता दिनेछौं ।’
