तीनवटै सुरक्षा निकायका प्रमुखसँग प्रधानमन्त्री शाहको उच्चस्तरीय छलफल
काठमाडौं— रसुवाको भोटेकोशी नदीमा आएको बाढीपछि सिर्जित परिस्थितिबारे प्रधानमन्त्री वालेन्द्र शाहले तीनवटै सुरक्षा निकायका प्रमुखसँग उच्चस्तरीय छलफल सुरु गर्नुभएको छ ।
बाढीबाट प्रभावित क्षेत्रमा जारी ८८खोज तथा उद्धार, राहत वितरण, घाइतेको उपचार तथा समग्र सुरक्षा अवस्थाबारे विस्तृत जानकारी लिन प्रधानमन्त्री शाहले सुरक्षा निकायका प्रमुखसँग छलफल गर्नुभएको हो ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा जारी छलफलमा प्रधानमन्त्री शाहले नेपाली सेनाका प्रधानसेनापति अशोकराज सिग्देलसँग बाढीपछिको अवस्थाबारे ब्रिफिङ लिइरहनुभएको छ ।
प्रधानसेनापति सिग्देलसँगको छलफलपछि प्रधानमन्त्री शाहले आजै नेपाल प्रहरीका महानिरीक्षक दानबहादुर कार्की तथा सशस्त्र प्रहरी बल, नेपालका महानिरीक्षक नारायणदत्त पौडेलसँग पनि छलफल गर्ने कार्यक्रम रहेको छ ।
छलफलका क्रममा बाढी प्रभावित क्षेत्रमा भइरहेका खोज तथा उद्धार अभियान, राहत तथा उपचारको अवस्था, सुरक्षा परिचालन र आगामी दिनमा अपनाउनुपर्ने रणनीतिबारे प्रधानमन्त्रीले आवश्यक निर्देशन दिने बताइएको छ ।
भदौ १० गते रसुवाको भोटेकोशी नदीमा आएको भीषण बाढीका कारण ठूलो जनधनको क्षति हुनुका साथै सडक, पुल तथा अन्य भौतिक संरचनामा समेत व्यापक क्षति पुगेको छ । बाढीपछि बेपत्ता भएकाको खोजी तथा प्रभावितको उद्धार र राहत कार्यलाई तीव्रता दिइएको छ ।
